Plantun de Prouvènço

Pèr coumpara dos planto d'encò nostre

Daphne gnidium & Aegilops cylindrica

Garou

Daphne gnidium

Thymelaeaceae

Àutri noum : Canto-perdris, Bos-d'auriho, Sorbo-galino, Boufo-galino, Erbo-laurino.

Noms en français : Garou, Sain-bois.

Descripcioun :
Lou garou es un aubret que fai de lòngui ramo amarinouso e que trachisson vite. Li fueio soun longo e un pau espèsso (fotò). Fai de flour blanco e de fru roujo un cop madur.

Usanço :
Es uno planto forço empouisounanto, majamen si fru. Sa rusco èro acampado à passa tèms pèr n'en faire de poumado e "sougna" la pèu. Douno de bruladuro gravo, mesfisas-vous pèr lis iue. La doso mourtalo èi d'uno deseno de fru (caup d'eterousido).

Port : Aubret
Taio : 50 à 200 cm
Fueio : alterno
Tipe bioulougico : Camefite
Cicle bioulougico : Planto renadivo

Gènre : Daphne
Famiho : Thymelaeaceae

Coulour de la flour : Blanco
Petalo : 4
Ø (o loungour) flour : 6 à 10 mm
Flourido : Printèms - Estiéu - Óutobre

Sòu : Ca
Autour basso e auto : Pancaro entresigna
Aparado : Noun
Remarco :
Mars à óutobre

Liò : Relarg à jòuinis aubret - Garrigo - Colo
Estànci : Termoumediterran à Mesoumediterran
Couroulougi : Mediterranenco-Atlantico
Ref. sc. : Daphne gnidium L., 1753

Blad-dóu-diable(-di-long)

Aegilops cylindrica

Poaceae Graminaceae

Nom en français : Égilope cylindrique.

Descripcioun :
Aquéu blad-dóu-diable vèn de Turquìo e se pòu trouba d'eici d'eila dins li champ e lis escoumbre. Aleva noste relarg d'auto Prouvènço èi pulèu rare. Se recounèis à sa longo espigo que fai uno meno de cilindre de 4 mm de diamètre. Lis arèsto di glumo e di lemma soun courteto à la baso e loungarudo au soumet de l'espigo. Coumpara amé Aegilops ventricosa que ié sèmblo, mai que lis espigueto soun pu redouno.

Usanço :
Li blad-dóu-diable soun proche dis àvi fèr de nòsti blad cultiva. Soun adounc bon à manja, mai sara un pau long pèr n'en acampa li grano. Èron acampa en Sicilo à passa tèms.